បន្ទាយមានជ័យ៖ ក្រុមការងារជំនាញពាក់ព័ន្ធឃាត់បានរថយន្ត ១គ្រឿង ដឹកផលិតផលប្រហិតចម្រុះជាង ៦ពាន់គីឡូក្រាម នាំចូលពីប្រទេសថៃឡង់ដ៌ តាមច្រករបៀង ស្រុកថ្មពួក ខេត្តបន្ទាយមានជ័យ នៅថ្ងៃទី៣ ខែធ្នូ ឆ្នាំ២០២៣។

ក្រុមការងារអន្តរាគមបង្រ្កាបបទល្មើសចលនាសត្វ និងផលិតផលសត្វ របស់ការិយាល័យផលិតកម្ម និងបសុព្យាបាលខេត្តបន្ទាយមានជ័យសហការជាមួយបញ្ជាការដ្ឋានអាវុធហត្ថស្រុកថ្មពួក បានឃាត់ចាប់រថយន្តចំនួន ១គ្រឿង ម៉ាក SSANGYONG ពណ៌ស ជាប្រភេទរថយន្តដឹកអ្នកដំណើរ ១៥កៅអី ពាក់ស្លាកលេខបាត់ដំបង ២A-៧៨៥៣ ដឹកផលិតផលមានដើមកំណើតពីសត្វ (ប្រហិតចម្រុះ) សរុបចំនួន ៦ ៦៤០គីឡូក្រាម ដោយផលិតផលប្រហិតចម្រុះខាងលើនោះ នាំចូលពីប្រទេសថៃឡង់ដ៌ តាមច្រករបៀង ស្រុកថ្មពួក ខេត្តបន្ទាយមានជ័យ ឆ្ពោះទៅលក់ចែកចាយបន្តនៅខេត្តបន្ទាយមានជ័យ។

ក្រុមការងារបានឃាត់ចាប់នៅលើផ្លូវជាតិត្រង់ចំណុចក្បាលស្ពានទី១ ភូមិកសិណ ឃុំថ្មពួក ស្រុកថ្មពួក ខេត្តបន្ទាយមានជ័យ ដោយគ្មានលិខិតអនុញ្ញាតពីក្រសួងកសិកម្ម រុក្ខាប្រមាញ់ និងនេសាទ ដូចនេះក្រុមអន្តរាគមបង្ក្រាបបទល្មើសចលនាសត្វ និងផលិតកម្មសត្វ បាននាំយកវត្ថតាំងដែលមានប្រហិតចម្រុះសរុបចំនួន ៦ ៦៤០គីឡូក្រាម និងរថយន្តចំនួន ១គ្រឿង ទៅរក្សាទុកនៅចត្តាឡីស័ករបស់មន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យដើម្បីចាត់វិធានការតាមនីតិវិធីច្បាប់។

គួរឱ្យដឹងដែរថា កាលពីរសៀលថ្ងៃទី០៤ ខែធ្នូ ឆ្នាំ២០២៣ ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ និងការិយាល័យផលិតកម្ម និងបសុព្យាបាលរាជធានីភ្នំពេញ ចុះបង្រ្កាបបានសាច់បង្កកសរុបជិត ៤០ម៉ឺនគីឡូក្រាម ច្រកក្នុងកេះជាង២ម៉ឺនកេះ ស្ថិតនៅក្នុងឃ្លាំងស្តុកមួយកន្លែងនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ កាលពីរសៀលថ្ងៃទី០៤ ខែធ្នូ ឆ្នាំ២០២៣។